مساء الخير عليكم هنتكلم فى موضوع حلو اوى النهارده وهو حماتى الكارثه البشريه المأجوجيه اللى معرفش ليه دايما بتتطلع كده فى بعض الاحيان تقلب الحياه كلها المهم بقى انتى اكيد مش هتخسرى جوزك ولا خطيبك علشان شوية كلام على شويه افعال منها, لالا دول ساعتين وخلاص استحملى واوعى تفكرى تزعلى من جوزك أو تخلى امه تأثر على علاقتكم ببعض هو ما يقدرش يغضب امه علشانك لازم برضه تقدرى النقطه دى كويس واوعى فى يوم تيجى تقولى ان هو كده مش عنده شخصيه او مش بيحافظ على كرامتك لأ بالعكس هو اكيد مش راضى عن اللى بيحصل بس مايقدرش يزعل امه علشانك كده هو بيولع الأمور أكتر لكن لما يرجع وانتى فى البيت ويقولك معلش كده هو صح .. اسمعى بقى يا ست الكل
انتى وحماتك مش اعداء لا سمح الله بس كل ما فى الأمر ان اى أم بتبقى حاسه انها تعبت وكبرت وان ده حته منها جت بنت مره واحده خطفته منها بتتصرف تصروفات غصب عنها وبيكون فيها طفوليه شويه تقدرى تكسبيها بسهولة جدا بس انتى اللى مش بتحاولى تعملى كده .
1- مفيش اى مانع انك تحاولى تشاركى حماتك حاجه هى بتحب تعملها
2- امسحى كلمة طنط دى من قاموسك وخليها ماما
3- اقنعى جوزك ان هو مايدلعكيش قدامها لأ ده كمان يتريق ويشكر فى امه اللى هى كل حاجه منها حلوه
4- اعملى يوم مخصوص تروحى فى انتى وهو من اول اليوم او تعزميها عندك وحاولى بقدر الامكان اليوم ده انت اللى تطبخى الأكل اللى هى بتحبه
5- اتكلمى كتير عن جوزك اللى دايما يقول ان ماما كانت بتعمل كذا وكذا
6- اى حاجه تقولك ان كان نفسها فيها لازم تجرى تدورى عليها وترجعلها بيها
7- خليها تيجى تقضى عندك كام يوم وخليها تعيش ملكه اليومين دول
8- حاولى تبعدى تماماً عن انك انتى اللى تقولى لجوزك وانتى عندها يلا نمشى
9- دايما اشكرى فى اكلها وفى جمالها وانها لسه شباب وحاولى تشترى هدايا خاصه بيها تحسسها انها لسه صغيره او شباب زى الكريم والمكياج وحاجات البنات دى
10- اهم حاجه بقى انك فى مره تتصلى بيها وتعرفيها انك مش عارفه تعملى اكله زى ما بتعملها وخليها تقولك الطريقه وعرفيها انك هتحاولى تعمليها زيها
11- لما تيجى تروحى مكان مختلف وجديد انتى وجوزك مفيش مانع انك تاخديها مره معاكى
12- ولما تروحى تعملى تسوق حاولى انها تنزل معاكى وخليها تختارلك كل حاجه عاوزاها لبيتك حتى لو ماعجبتكيش
جربى واكيد اكيد مش هتخسرى واعرفى انك كل ماتكسبى قلب حماتك انتى كمان بتكسبى قلب جوزك وتعيشى حياه مريحه نفسياً وعصبياً وتقدرى بقى تعيشى مع جوزك مرتاحه
ليست هناك تعليقات:
إرسال تعليق