طبعا كل واحدة متزوجة بتدور على الحياه الجميلة في زواجها و بتسعى لتكوين اسرة سعيدة وعشان يتحقق دة لازم تعملي جهد كبير جدا و مش بس انتي ده زوجك كمان عشان كل واحد فيكوا يقدر يحقق السعادة للطرف التاني.لكن بما إن الحياه الزوجية علم وفن وهندسة فلازم تتعلموه انتوا الاتنين عشان تتجنبوا المشاحنات و اللي ممكن تحصل لأسباب تافهة.
وبصفتي أنثى وان الصفحة كلها للسيدات و البنات فقط فأنا أكيد أكيد هتكلم معاكي عن اللي ممكن يضايق زوجك منك عشان تتجنبيها وتعملي اللي عليكي و ميبقاش سبب المشكلة في الآخر منك انتي ونحط حد للتلاكيك دي
بصي يا ستي:
أول حاجة لما جوزك يرجع من الشغل متأخر وطبعا هيحتاج للراحة اوعي اوعي تفكري تنظفي الشقة خاااالص وسيبيها تضرب تقلب لحد ما يمشي تاني يوم الصبح , مهو اصل محبكتش يعني تشغلي المكنسة فوق دماغة و هو موجود لأن أول حاجة هيقولهالك " هو انتي مش قادرة تخلصي الشقة قبل ما آجي و للا حتى تأجلي المهمة دي ليوم تاني" ده طبعا اذا مسابلكيش البيت وراح نام عند الست حماتك..ويا لهوي بقى لو حصلت ده انتي هتبقي عملتي زي الزمالك لما بيجيب جون في نفسة. القصد , انسي الأشغال الشاقة وهو راجع من الشغل.
تاني حاجة بقى لو جوزك بيحب الكورة و انتي هتتجنني و تخرجي اليوم دة...ويا سلام بقى لو كان مظبط اليوم دة مع اصحابة عشان يشوفو الماتش سوا و انتي شغلتي الزنانة بالكهربا و عايزة تخرجي, هنا بقولك انتي المسئولة عن لم بقايا التليفزيون اللي اتكسر او انتي اللي هتدفعي فاتورة الكافية اللي نزل يشوف الماتش فية هو و اصحابة و سابك لحد ما تخلصي زن و تدوخي و تقعي أو الكهربا بتاعتك تقطع لوحدها.
تالت حاجة واوعي تزهقي, متفضليش كل شوية تقوليلو " انت بتحبني يا مرسي؟" عمال على بطال عشان هيحس ساعتها انك عندك نقص في حاجة و مش واثقة من نفسك عشان كدة خايفة يروح لحد غيرك.. هنا هيزهق منك و هيعمل اللي انتي خايفة منة لكن لو انتي عندك ثقة بنفسك و انة مش ممكن يسيبك ابدا سلعتها هو اللي هيخاف انتي حبك يقل من ناحيتة
رابع حاجة, متعمليش فيها شارلوك هولمز وتكوني فضولية و تسالية عن كل حاجة حصلت في يومة الصغيرة قبل الكبيرة وتفضلي تقولي رايح فين و جيت منين و ايه البرفان الحريمي دة و كلمت مين النهاردة و مين كلمك؟
هنا بقى اكيد اكيد يا هيسيبلك البيت و يمشي يا هيسيبلك البيت و يمشي لأن الراجل بطبيعتة مبيحبش الأسئلة الكتير وبيحب يتعامل بمبدأ الثقة يعني كل ما تثقي فية هو هيحترم الثقة دي و مش هيعمل حاجة تزعلك كمان سيبيلة بعض المساحة في حياتة لأنة اكيد في وقت بيحب الخصوصية وبرضة لو حاسس انة محتاج يحكيلك حاجة هيحكيلك من غير ما تسألية
خامس حاجة: متعاملهوش زي الطفل الصغير اللي دايما بيغلط و تفضلي تديلة في نصايح زي مثلا " انا قلتلك ميت مرة متسيبش الشباك مفتوح" لانة هنا هيقولك " هو انا صغير الله يمسيكي بالخير يا ماما مكنتيش بتزعقيلي" ومدام حطك في مقارنة مع ماما يبقى علية العوض
سادس حاجة: متضايقيش منة لو عمل فيها ابلة نظيرة و دخل معاكي المطبخ يساعدك وتقوليلة " اطلع برة انت خايلتني مش عارفة اشتغل وانت واقفلي زي عمود النور كدة" لأنة طبيعي هتسمعي منة " هو انتي فاكرة نفسك انك انتي بس اللي بتعرفي تطبخي وللا بتفهمي في حاجة" والدنيا بعدها هتتقلب وهنعيد ترميم الشقة من جديد , لأ سيبية يساعدك حتى لو معملش الحاجة كويس بس هيحس انة لية دور في البيت زيك بالظبط
سابعا"هانت":مش كل شوية تتصلي بية وهو في الشغل او مع اصحابة وسيبية لوحدة شوية عشان على الأقل يحس انك واحشاه وعايز يشوفك ويسمع صوتك
ثامنا: لما تشوفية ساكت شوية اسألية مالك مرة واحدة بس وبلاش ماسورة مالك اللي بتنفجر دي, والله يابنتي قاللك الموضوع اية يبقى خير وبركة , مقلكيش يبقى متزنيش و سيبية لما يحس انة عاوز يتكلم هيتكلم اكيد معاكي مش مع البواب, اسمعي مني بدل ما تسمعي كلمة " أف, هو الواحد ميعرفش يقعد لوحدة شوية" وساعتها هتعملي فيها بطلة المصارعة الحرة و هتقلبي البيت عاليها و اطيها
اديني قلتلك على شوية حاجات بتضايق جوزك منك خدي بالك منها ومتعمليهاش و خليكي لطيفة حنينة وانتي و شطارتك بقى
ليست هناك تعليقات:
إرسال تعليق