شعرك تاج رأسك

شعرك هو تاج رأسك وهو اللي بيكمل جمالك عشان كدة لازم تعتني بية كويس وبالذات لو كنتي محجبة عشان يفضل صحي و ميفقدش بريقة..وكمان لازم تعرفي ان شعرك هو المرايا اللي بتعكس صحتك الداخلية بمعنى لو كان غذائك صحي هينعكس على شعرك بالتغذية السليمة وبالتالي هيأثر في شكلة.
كمان عليكي انك تعرفي ان طريقة العناية في فصل الصيف بتختلف عن الشتا لإختلاف العوامل اللي بتأثر على الشعر زي درجة الحرارة و نسبة الرطوبة
وهنا في أحلام الصبايا هنعرفك على انواع الشعر وطرق الاهتمام بكل نوع وكمان هنقولك على بعض النصايح المفيدة في العناية بشعركك

انواع الشعر
أ- الشعر الجاف :
النوع ده من الشعر بيكون شكلة باهت من غير حيوية و بريق وده بيكون ناتج عن سوء التغذية او ضعف الغدد الدهنية الموجودة في فروة الراس و كمان العوامل الخارجية زي الصبغة و السيشوار او المكواه

طرق العناية بالشعر الجاف:
اول حاجة لازم تهتمي بالتغذية وتاكلي الاغذية اللي بتحتوي على البروتينات
ابعدي عن المواد الكيماوية في علاج شعرك زي كريمات الفرد و الصبغات
متعضيش شعرك للسخونة المباشرة زي المياه السخنة او السيشوار و المكواه
اغسلي شعرك بشامبو يحتوي على مواد زيتية او ممكن انتي تضيفي زيت اللوز او الجوجوبا لزجاجة الشامبو بتاعتك
استخدمي الكريمات المرطبة للشعر بعد غسلة
اهتمي بعمل حمامات الزيوت الطبيعية كل اسبوع
وهقولك هنا ازاي تعملي حمام زيت لشعرك:
اعملي خلطة من زيت جنين القمح و الجوجوبا و الجرجير و زيت اللوز و زيت الزيتون وزيت حبة البركة وسخنيهم في حمام مياه

ب- الشعر الدهني:
الشعر الدهني مرتبط بفروة الراس الدهنية وهي اللي بتفرز كمية زائدة من الدهون نتيجة زيادة نشاط الغدد الدهنية في فروة الراس والنوع ده من الشعر بيتعرض بسرعة للقشر و الاتساخ عشان كدة هو بحاجة للعناية باستمرار


طرق العناية بالشعر الدهني
كل ما تحسي ان نسبة الدهون زادت في شعرك بشكل ملحوظ اغسلية وضيفي لماء الشطف نقط من الليمون لانة بيساعد على اختفاء الدهون
وكمان قللي من الاطعمة اللي بتعمل على زيادة افراز الدهون زي البهارات و التوابل و الشيكولاتة و المشروبات السخنة جدا


ج- الشعر العادي
هو الشعر اللي فيه نسبة من الدهون لكن بشكل معتدل وهو شعر وسط مفيهوش مظاهر الشعر الدهني او الجاف ونادر وجود المشاكل فية والاهتمام بيه بيكون عن طريق الاهتمام بنظاتة بالطريقة المعتادة و الابتعاد عن كل اللي بيسبب جفاف الشعر او بيمنحة المظهر الدهني

مشكلات الشعر
طبعا مفيش واحدة فينا مبتواجهش مشاكل في شعرها مهما كان نوعة من تقصف وسقوط و قشرة و ضعف وهقولك هنا على بعض المشاكل اللي بتواجة الشعر و كمان طريقة علاجها

1- تقصف الشعر

تقصف الشعر ليه اسباب كتير اهمها ارتفاع درجة حرارة الجو بنسبة كبيرة كمان غسل الشعر بصابون قوي مزيل لدهون فروة الراس اللازمة لمرونة الشعر كمان عدم شطف الشعر كويس من الشامبو او البلسم بعد غسلة بيؤدي لتقصفة
من اسباب التقصف كمان عدم غسل الشعر فترة طويلة او تعريضة للسيشوار او المكواه و اهم حاجة زي ما قلنا سوء التغذية
وعشان تتخلصي من المشكلة دي تدريجيا لازم تقصي اطراف شعرك بشكل منتظم كل 4 اسابيع عشان تجددي نشاط الشعر
2 - قشر الشعر :
من اسباب ظهور قشر الشعر هو حك فروة الراس بالمشط او بغيرة بعنف وكمان عدم الاهتمام بغسل الشعر وتنظيفة خاصة اذا كان دهني..التوتر العصبي و القلق سبب تاني لظهور قشرة الشعر كمان غطاء الراس من النيلون او البوليستر خاصة للمحجبات هو سبب رئيسي في ظهور القشرة
اما عن علاج قشرة الشعر فبيكون:
ابعدي عن كل شيئ يؤدي للقلق و التوتر
بالنسبة للمحجبات يفضل استخدام اغطية الراس تحت الايشارب (الباندانا) المصنوعة من القطن
دلكي فروة الراس يوميا بزيت الزيتون او زيت اللوز المضاف لية زيت الروز ماري ولفي الشعر و اغسلية الصبح بمياه دافية يوميا لحد ما يختفي القشر

3-ظهور الشعر الابيض في سن مبكر:
الشعر الابيض هو نتيجة طبيعية للتقدم في السن وهو نتيجة توقف الخلايا الملونة في بصيلة الشعر عن تكوين الصبغة الطبيعية وهو وبيتعرض لية كل الناس بلا استثناء لكن في حالات بيظهر فيها الشعر الابيض في سن مبكر

اما عن علاج مشكلة ظهور الشعر الابيض في سن مبكر فبتكون عن طريق تناول بعض الاغذية المقاومة لذلك زي شرب اللبن الرايب و العسل الاسود ثلاث مرات يوميا

تلوين الشعر
طبعا كل واحدة فينا بتحب تعمل لوك مختلف لنفسها عن طريق تلوين الشعر او قصة بأحدث القصات لكن في نفس الوقت بتحب يكون الموضوع بشكل طبيعي بعيد عن الكيماويات وقليل في تكاليفة عشان كدة هقولك على وصفات بيتي لتلوين شعرك طبيعية مش مكلفة:

اللون البني
عشان تعملي اللون البني هاتي:
10 ملاعق كبيرة حناء .
عصير ليمونة واحدة.
3 ملاعق من خل التفاح أو الخل العادي.
4 ملاعق قشور باذنجان.
مقدار مناسب من الماء الساخن اللي يخللي الخليط متماسك مش سائل .
امزجي جميع المكونات ما عدا عصير الليمون.. سيبيها تتخمر لمدة 3 ساعات بعد كدة ضيفي عصير الليمون و سيبيها على شعرك من ساعة الى 3 ساعات حسب درجة اللون المطلوبة..

اللون البني المحمر
10 ملاعق كبيرة حناء .
عصير ليمونة.
3 ملاعق من خل التفاح أو الخل العادي .
ملعقتان من القهوة العربية.
مقدار مناسب من الماء الساخن.
نفس الطريقة اللي فاتت

لون الشوكولاته
10ملاعق كبيرة حناء .
عصير ليمونة .
3ملاعق من خل التفاح أو الخل العادي.
4 ملاعق من بودرة الكاكاو .
مقدار مناسب من الماء الساخن.
نفس الطريقة اللي فاتت

اللون الأحمر
10 ملاعق كبيرة حناء .
عصير ليمونة .
3ملاعق من خل التفاح أو الخل العادي.
كوب من مغلي الكركديه .
3 ملاعق من قشر الرمان المجفف.
مقدار مناسب من الماء الساخن.
نفس الطريقة

اللون الأشقر
10 ملاعق كبيرة حناء .
عصير ليمونة .
3ملاعق من خل التفاح أو الخل العادي.
4 ملاعق كركم .
مقدار مناسب من الماء الساخن.
نفس الطريقة

خدي بالك

- حافظي على صحتك لان كل اللي بيضر صحتك اكيد بيضر شعرك
- متستعمليش السيشوار و المكواه كتير على شعرك و ان حصل لازم تعتني بشعرك بعدها عشان تعوضي التلف اللي هيصيب شعرك
- حافظي على شعرك دايما نظيف فللشعر الدهني بنصحك بغسلة كل يوم او يومين والشعر الجاف اغسلية مرتين في الاسبوع
- متمشطيش شعرك ابدا وهو مبلول لكن استخدمي اطراف اصابعك في تسويتة ومشطية لما يجف تماما
- استخدمي مشط خشبي لشعرك بدل المشط المصنوع من البلاستيك
- غيري نوع الشامبو والبلسم باستمرار عشان شعرك ميتعودش على نوع واحد و بالتالي مش هيستفيد منة